Gwobrau'r Ffatri Bop 2007
Noson fawr, noson dda, noson hwyr!
Mae'r gwobre yn ei seithfed flwyddyn, ac eleni, o'dd y seremoni yn cael ei chynnal yn y Neuadd Fawr ym Mhrifysgol Caerdydd. Digon o win, fodca, a chwrw ar y byrdde, ond o'n i gefn llwyfan efo Mr Glyn Wise, yn siarad efo hwn a'r llall!
Mi gafon ni'r fraint o gael mynd ar y llwyfan hefyd, efo Alex Zane (sy'n hyfryd gyda llaw!) i gyflwyno gwobr C2 i'r band Cymraeg gore. Categori poeth iawn, a 4 o'n hoff grwpie i ar y rhestr fer - Euros Childs, Radio Luxembourg, Genod Droog, a'r Sibrydion. A'r Sibrydion nath ennill! Mor falch drosta nhw, ond doedd Daf druan, y drymiwr, ddim yn gwbod be i ddeud pan ddoth o ar y llwyfan i dderbyn y wobr! Er, wedi meddwl, di drymars byth yn deud lot! Ond eniwe, yn ddiddorol iawn, mi oedd Mei Gwynedd yn bresennol neithiwr, ond doedd na'm golwg ohona fo ar y foment dyngedfenol, achos o'dd o tu allan yn cael ffag! Gath Glyn a fi air efo'r ddau ohonyn nhw wedyn, ac oedde nhw'n amlwg yn hapus iawn.
Hefin Mattoidz yn helpu Daf a Mei o Sibrydion i ddathlu eu gwobr!
O ran perfformadiadau byw y noson, gafon ni un gan gan Funeral For a Friend. Nes i fethu nhw'n anffodus, ond yn ôl y sôn, doedde nhw'm yn dda iawn, ac yn sicr ddim yn haeddu ennill categori band byw y flwyddyn ar y perfformiad yne. Trafodwch!
O 'na ferch ifanc yne yn chware'r delyn - Georgia Ruth Williams - o Aberystwyth yn wreiddiol, ac yn astudio'n Caergrawnt ar y funud. Hogan lyfli, sy'n chware stwff gwerin eitha traddodiadol a diddorol, ac yn canu 'fyd. Di ddim 'di recordio dim byd Cymraeg eto, ond yn gobeithio gwneud yn y dyfodol agos, a dwi 'di son wrthi am sesiwn acwstic. Wedyn i gloi'r noson, y grwp boncyrs gwych o Lerpwl, y Wombats! Mond un gân yn anffodus, "Lets dance to Joy Division", ond oedde nhw'n bril a llawn egni.
Felly, y pethe pwysig, y canlyniade. Wel da chi'n gwbod bod y Sibrydion 'di ennill gwobr C2, band Cymraeg y flwyddyn, a bod Funeral For a Friend di ennill band byw y flwyddyn. Y Manics nath ennill band y flwyddyn, Kids in Glass Houses - band newydd y flwyddyn, a'r Automatic nath ennill band sy di llwyddo'n ryngwladol.
Prif wobr y noson, cyfraniad oes i gerddoriaeth yma yng Nghymru, yn mynd i Mike Peters. Dyn annwyl, diymhongar, a normal iawn! A nath o ddeud wrthai wedyn bod o wrth ei fodd efo'r wobr (er bod o 'di torri!), yn enwedig o ystyried 'chydig o flynyddoedd nôl, doedd o'm yn meddwl bod o'n mynd i fyw lot hirach. Felly oedd hi'n noson arbennig iawn idda fo'n amlwg. Ac o leia odd o'n haeddu ei wobr! Sori, ond dwi jyst braidd yn siomedig bod albym y flwyddyn 'di mynd i'r Stereophonics! Esboniad plis? Sut nath "Pull the Pin" guro "Hey Venus" gan y Super Furry Animals?
Erbyn tua deg o'r gloch, o'dd y seremoni 'di dod i ben, o'dd Glyn a fi 'di gorffen ein gwaith gefn llwyfan, ac o'dd y ddau ohonom angen diod! Felly, mynd i chwilio am bawb arall, a dechre cymdeithasu! A fel dwi 'di deud yn barod, o'dd hi'n noson fawr, noson dda, a noson hwyr!
Reit, dwi ffwrdd i'n ngwely am cwpwl o orie cyn rhaglen heno, felly welai chi am ddeg! Hwyl!
Y newyddion diweddaraf am gerddoriaeth, gigs, artistiaid a mwy gan griw C2.